Proklamasie

Veer, Prins Thei d’n Ièrsjte van Valkeberg en Minister Frans,allebei gebore en getoge in de Thibaltsjtraot en nog ummer wonend aan d’n over van de Geul;Sjtadsprins en Minister van ‘t 969 jaor ouwe Valkeberg aan de Geul;Ambassadäöre van meziek en sjport in ’t algemein en in ’t biezunder van Tuutendöl, de Zaate Herriemenie,Walram’s Genootschap en Voetbalkluup Walram. Veer verordonnere en proklamere  

Ten èllefde: dat veer dit jaor zölle heersje euver ‘t Sjtedsje aan de Geul en dat veer same mèt alle Valkebergersj eine geweldige Vastelaovend zölle viere. Daorum veure veer de kommende Vastelaovend neet de wintertied meh de Karnavalstied in. Houwt geer dus rekening de mèt dat de klok ederen daag ein oer truuk kint, zoadat de Karneval dit jaor ekstra lang zal doere.  

Ten tiènde: umtot noe neet eine, ouch gein twiè, meh zelfs drie Prinse in de Betsy Perklaan wone, laote veer uuch weite dat dees sjtraot vanaaf noe Prinselikke Allee zal heisje. ’t Ies dan ouch daorum dat veer de jónges van Kartoesj gevraog höbbe um hunne sjlager aan te passe. “Veer höbbe ‘ne Prins in de sjtraot”  ies dus noe “Veer höbbe drie Prinse in de sjtraot”. 

Ten neugende: dat ‘t jeugdigste tiem van Walram, ‘t veerde, dit jaor kampioen weurt. Dat ies namelek de bèste promosie veur dizze Prins en de Minister. Mèt zoaväöl raffinesse en ervaring in ‘t èlftal moet dat zeker goon lökke. 

Ten achste: dat es Léon van Crutzen oes Valkebergs Leeuw-beer weer truuk kriet in de sjtraot van de Minister dan zal iech, Prins Thei d’n Ièrsjte, eigenhendig de flesje daoveur blooze in Mestreech bie de glaasfebriek. Ouch moete veer dan plestieke bekersj achterwege laote en veural de glazer in de loch heffe. 

Ten zevende: dat wie noe de lètste groate treurwiej in ‘t centrum ouch draan moet geluive, veer de gemeinte oprope um neet allein veur dizze boum eine nuje te plante, meh noe ouch aan de belofte te voldoon um eindelek die sjoan treurwiej van de Kurkapel op ‘t Theodoor Dorreplein te herplante. 

Ten zèsde: dat veer uuch ouch zègke dat ein wètsontwerp in de maak ies, woa in vasgelag zal were dat es de nuuj Geulpoort klaor ies, mèt Ouwieverbal geine onverkleide miè dao onderdoor maog. Ouch zal dees poort gein belemmering maoge zin um ozen optoch door de Groate Sjtraot te laote goon, want dan zouwe veer in Valkeberg zeker verkièrde historie sjrieve. 

Ten viefde: dat oes twiè hermenieje van Valkeberg tot in lengte van jaore de kinger bloosmeziek moete blieve lière. Dan kint de jeug ouch ummer de Karnevalsmeziek blieve sjteune en zal Vastelaovend noats verlore goon. 

Ten veerde: dat ederein de nuuje sjlager moet oetdrage mèt de Vasteloavend. Veer zölle deveur zörge dat ederein de partieje daovan kriet. En die zint dan neet allein op noate te kriege, meh were ouch digitaal oetgesjreve. Dan kint ederein de ventiele good vinge. 

Ten driede: dat veer neet bang zin veur ‘t Fusie-spjoak dat in Valkeberg nog ummer rondgeit. Walram weurt nao zoa’n fusie ein groate vereiniging, mèt neve de afdeiling zangk, hermenie, drumband en jeug-orkes ouch ein aafdeiling sjport. Veer es Prins en Minister sjpare oes dan ouch nog ins de hèlf van de kontribusie oet. 

Ten twiède: dat veer gruètsj zin dat veer zoane sjoane groate optoch höbbe in Valkeberg, meh dat veer d’n optoch op de Zondeg zeker zoa sjiek vinge. Veer rope dan ouch alle groate en klein jónges en maedsjes op um same mèt de Jeugkarneval ouch op de zondeg mit te trèkke. 

Ten ièrsjte: dat es geer oes die daag zouwt zeuke en geer uuch afvraog woa zint die urreges, kómp dan allemaol nao oeze Prinsetempel, kómp dan nao Brasserie Amrica. Loat dan tot sjlot ouch dudelek zin dat oes motto veur die daag ies: 

Vier Vastelaovend mèt ‘n denske en ‘ne lach,vergeet dien zörg en zing tot in de nach. 

Gegaeve in de Groate Sjtraot in Valkeberg op drie Jannewarie van ‘t jaor 2010,            

Prins Thei d’n Ièrsjte en ziene Minister Frans